कासारवाडी येथे महावाचन उत्सव स्पर्धेतील सहभागी विद्यार्थ्यांचा सन्मान

 

महावाचन उत्सव स्पर्धेतील सहभागी विद्यार्थ्यांचा तसेच शालेय मंत्रिमंडळाच्या वतीने घेण्यात आलेल्या चित्रकला स्पर्धेचा बक्षीस वितरण सोहळा जिल्हा परिषद प्राथमिक शाळा कासारवाडी केंद्र मिरवट येथे उत्साहात पार पडला.

इयत्ता तिसरी ते आठवीच्या विद्यार्थ्यांनी महाराष्ट्र शासनाने सुरू केलेल्या महावाचन उत्सव स्पर्धेत सहभाग नोंदवला. या स्पर्धेमध्ये विद्यार्थ्यांनी वाचलेल्या पुस्तकाचे परीक्षण लिहावयाचे असते. विद्यार्थ्यांनी लिहिलेल्या पुस्तकांच्या परीक्षणाचे वाचन करून रेकॉर्डिंगही त्यांच्या आवाजात करण्यात आली.  

शालेय मंत्रिमंडळाच्या वतीने मासिक स्पर्धेतील चित्रकला स्पर्धेचे बक्षीस वितरण याचवेळी करण्यात आले. प्रत्येक वर्गातून तीन विद्यार्थी यासाठी निवडले होते. इयत्ता पहिली दुसरीला रंगभरण तर वरच्या वर्गांसाठी चित्र काढून रंगवण्याची स्पर्धा घेण्यात आली होती. 

यावेळी मुख्याध्यापक श्री डी. बी. राठोड तसेच श्री चंद्रशेखर फुटके, श्री सरोजकुमार तरुडे, श्री राजेश्वर स्वामी, श्रीमती प्रिया काळे, श्रीमती शुभांगी चट आणि मुख्यमंत्री युवा प्रशिक्षण कार्यक्रमांतर्गत रुजू झालेल्या कु पूजा शालीवान गुट्टे यांनी विद्यार्थ्यांना प्रमाणपत्र देऊन सन्मानित केले.  

कासारवाडीच्या शाळेत शालेय मंत्रिमंडळाने केला शिक्षक दिन साजरा

 

जिल्हा परिषद प्राथमिक शाळा कासारवाडी केंद्र मिरवट येथे शालेय मंत्रिमंडळाच्या वतीने आज डॉक्टर सर्वपल्ली राधाकृष्णन यांचा जन्मदिन अर्थात शिक्षक दिन उत्साहात साजरा करण्यात आला. 

इयत्ता तिसरी ते आठवीच्या शालेय मंत्रिमंडळात असणाऱ्या विद्यार्थ्यांनी या कार्यक्रमाचे नियोजन केले होते. कार्यक्रमाच्या सुरुवातीस डॉक्टर सर्वपल्ली राधाकृष्णन यांच्या प्रतिमेचे पूजन मुख्याध्यापक श्री राठोड आणि शिक्षकवृंदांच्या हस्ते करण्यात आले. उपस्थित असणाऱ्या प्रत्येक विद्यार्थ्यांनी आपल्या सोबत आणलेले पुष्प प्रतिमेस अर्पण करून अभिवादन केले. शालेय मंत्रिमंडळातील विविध मंत्र्यांनी प्रत्येक शिक्षकाचे आज शिक्षक दिनी स्वागत केले. 

यावेळी व्यासपीठावर अध्यक्ष म्हणून मुख्याध्यापक श्री राठोड तसेच व्यासपीठावर श्री चंद्रशेखर फुटके, श्री सरोजकुमार तरुडे, श्री राजेश्वर स्वामी, श्रीमती प्रिया काळे, श्रीमती शुभांगी चट आणि मुख्यमंत्री युवा प्रशिक्षण कार्यक्रमांतर्गत रुजू झालेल्या कु पूजा शालीवान गुट्टे यांची उपस्थिती होती. 

पाचव्या वर्गात शिकणारी कुमारी पूनम बालासाहेब गुट्टे, आठव्या वर्गात शिकणारी कुमारी अक्षरा सचिन गुट्टे तसेच सहाव्या वर्गात शिकणारी कुमारी श्रुती बालासाहेब दहिफळे यांनी शिक्षकांविषयी आपले मनोगत व्यक्त केले. 
कार्यक्रमाचे सूत्रसंचालन शालेय मंत्रिमंडळाचा सदस्य चि. राम नाथराव लव्हारे याने केले.  

मुख्याध्यापक राठोड सर यांनी विद्यार्थ्यांना मार्गदर्शन केल्यानंतर शालेय मंत्रिमंडळाच्या वतीने आभार मानण्यात आले व कार्यक्रम संपला.

कार्यक्रम यशस्वी होण्यासाठी  शालेय मंत्रिमंडळाची मुख्यमंत्री कु अक्षरा संदीप गुट्टे, उपमुख्यमंत्री कु वैष्णवी विठ्ठल गुट्टे, मंत्री राम नाथराव लव्हारे, बालाजी महेश गुट्टे, श्रेयस बालासाहेब दहिफळे, आदिनाथ माणिक गुट्टे, राजश्री अंकुश गुट्टे, ईश्वरी अर्जुन गुट्टे आणि शिवकन्या सुनिल गुट्टे यांनी परिश्रम घेतले. 

भाषणांची झलक येथे पहा

वाढदिवसाच्या निमित्ताने बायकोस जाहीर पत्र!

 प्रिय सुजाता,
 तुझ्या वाढदिवसाच्या निमित्ताने तुला हे जाहीर पत्र लिहिण्याची ही माझी दुसरी वेळ आहे.... कदाचित काहींना वाटत असेल की हे पत्र नवऱ्याने बायकोला वाचून दाखवावे तर ते जाहीर कशाला करावे? पण या मागचा उद्देश नवविवाहित मुलींना प्रेरणा मिळावी हा सुद्धा आहे... 

 स्कॉलर केजी स्कूलची प्राचार्या म्हणून जेंव्हा तू तुझ्या शाळेच्या ऑफिसमध्ये आत्मविश्वासाने पालकांशी संवाद साधत असतेस तेंव्हा तुझ्याकडे पाहून अभिमान वाटतो... छोट्या जागेत सुरू झालेली शाळा मागच्या वर्षी नव्या जागेत, पुरेशा सुविधा पुरवत सुरू आहे.... 

 "माझ्या शिक्षणाचा मला फायदा झाला पाहिजे, मी माझ्या स्वतःच्या पायावर उभे राहिले पाहिजे" लग्नानंतर हा विचार तू अनेकदा बोलून दाखवलास आणि त्यावर प्रामाणिक प्रयत्न करत स्वतःची शाळा उभी केलीस! लग्नानंतरही आपलं शिक्षण पुढे चालू ठेवून आज तू तुझ्यासह काही कुटुंबांना शाळेच्या माध्यमातून आर्थिक आधार देत आहेस.... 

 शाळेत असणारा स्टाफ म्हणजे जणू तुझ्या मैत्रिणीच! आपल्या सहकाऱ्यांशी कसं वागावं हे तुझ्याकडून शिकण्यासारखं! म्हणूनच तुझ्या शाळेत आलेला स्टाफ  सहसा काही अडचण असल्याशिवाय सोडून जातच नाही! 

 शाळेतली प्रत्येक समस्या अगदी शांतपणे आणि विचारपूर्वक सोडवण्याचा तुझा स्वभाव.... पालकांचे फोन सकाळच्या धामधूमीपासून अगदी कोणत्याही वेळी आले; तरी तितक्याच संयमानं तू त्यांना उत्तरे देतेस... 
 शाळेतल्या सर्व ऍक्टिव्हिटी अगदी निटनेटक्या व्हाव्यात म्हणून तू स्वतःहून भरपूर प्रयत्न करतेस आणि म्हणूनच तुझा स्टाफही तितकीच मेहनत घेतो... 

 प्रत्येक वर्गातल्या विद्यार्थ्यांकडे तुझे वैयक्तिक लक्ष असते म्हणून पालकांना तू सहजपणे बोलू शकतेस....जवळपास सर्वच विद्यार्थ्यांची नावे तू कशी काय लक्षात ठेवू शकतेस? तुझा विद्यार्थ्यांबद्दलचा हा जिव्हाळा मला नितांत आवडतो... 

 मागच्या काही वर्षात माझ्या तब्येतीकडे तुला जास्त लक्ष द्यावे लागते आहे; पण शाळेमूळे कधीच याकडेही दुर्लक्ष केले नाहीस... 
 माहेरची नाते कायम सांभाळत असताना सासरच्या नात्यांची वीण घट्ट ठेवणारा तुझा स्वभावही मला खूप आवडतो.... 

 आपली रसिका आता चांगल्या पदावर काम करत आपल्या घराला आर्थिक हातभार लावत आहे आणि रोहन तिच्याच पावलावर पाऊल देत उच्च शिक्षण घेत आहे... त्यांचा तुझा संवाद माझ्यापेक्षा अधिक मोकळा आणि मैत्रीचा असतो... त्यांच्या संगोपन आणि संस्काराचे श्रेय कितीतरी पटीने तुझ्याकडेच जाते....

 विचार - मनांनी आपण इतके जवळ आलेलो आहोत की आपल्यातले पती-पत्नीचे नाते आता निखळ मैत्रीचे झालेले आहे.... शाळा सुटल्यानंतर सायंकाळच्या वेळी तू तुझ्या शाळेतले किस्से सांगतेस मी माझ्या शाळेतले किस्से सांगतो... तुझ्यासोबतचा हा वेळ भुर्रकन उडत असतो! संसारातला प्रत्येक निर्णय आपण दोघे मैत्रीच्या नात्यामुळेच विचारांती घेत असतो.... 

 क्रिकेटची एखादी मॅच असेल तेव्हाच तू टीव्ही पाहतेस; एरवी कुठल्याही मालिका पाहण्याचा तुला अजिबात छंद नाही आणि जेव्हा जेव्हा तुला सवड असते तेव्हा घराची स्वच्छता करणे आणि घर नीटनेटके करणे यात तुला खूप आनंद मिळतो. तुझ्याशी गप्पा मारत मदत करता - करता आता हा माझ्याही सवयीचा भाग होत आहे!

 एक आदर्श पत्नी म्हणून मी सदैव तुला पाहिले आहे...
 तुझ्या वाढदिवसाच्या निमित्ताने तुला या पत्ररूपी शुभेच्छा देताना मला अत्यंत आनंद होत आहे... प्रभु वैद्यनाथाच्या आशीर्वादाने तुला उदंड, सुखी, निरोगी, आनंदी आयुष्य लाभो हीच प्रार्थना! 🙏🎂💐🎉

12.08.2024