वाढदिवसाच्या निमित्ताने बायकोस जाहीर पत्र!

 प्रिय सुजाता,
 तुझ्या वाढदिवसाच्या निमित्ताने तुला हे जाहीर पत्र लिहिण्याची ही माझी दुसरी वेळ आहे.... कदाचित काहींना वाटत असेल की हे पत्र नवऱ्याने बायकोला वाचून दाखवावे तर ते जाहीर कशाला करावे? पण या मागचा उद्देश नवविवाहित मुलींना प्रेरणा मिळावी हा सुद्धा आहे... 

 स्कॉलर केजी स्कूलची प्राचार्या म्हणून जेंव्हा तू तुझ्या शाळेच्या ऑफिसमध्ये आत्मविश्वासाने पालकांशी संवाद साधत असतेस तेंव्हा तुझ्याकडे पाहून अभिमान वाटतो... छोट्या जागेत सुरू झालेली शाळा मागच्या वर्षी नव्या जागेत, पुरेशा सुविधा पुरवत सुरू आहे.... 

 "माझ्या शिक्षणाचा मला फायदा झाला पाहिजे, मी माझ्या स्वतःच्या पायावर उभे राहिले पाहिजे" लग्नानंतर हा विचार तू अनेकदा बोलून दाखवलास आणि त्यावर प्रामाणिक प्रयत्न करत स्वतःची शाळा उभी केलीस! लग्नानंतरही आपलं शिक्षण पुढे चालू ठेवून आज तू तुझ्यासह काही कुटुंबांना शाळेच्या माध्यमातून आर्थिक आधार देत आहेस.... 

 शाळेत असणारा स्टाफ म्हणजे जणू तुझ्या मैत्रिणीच! आपल्या सहकाऱ्यांशी कसं वागावं हे तुझ्याकडून शिकण्यासारखं! म्हणूनच तुझ्या शाळेत आलेला स्टाफ  सहसा काही अडचण असल्याशिवाय सोडून जातच नाही! 

 शाळेतली प्रत्येक समस्या अगदी शांतपणे आणि विचारपूर्वक सोडवण्याचा तुझा स्वभाव.... पालकांचे फोन सकाळच्या धामधूमीपासून अगदी कोणत्याही वेळी आले; तरी तितक्याच संयमानं तू त्यांना उत्तरे देतेस... 
 शाळेतल्या सर्व ऍक्टिव्हिटी अगदी निटनेटक्या व्हाव्यात म्हणून तू स्वतःहून भरपूर प्रयत्न करतेस आणि म्हणूनच तुझा स्टाफही तितकीच मेहनत घेतो... 

 प्रत्येक वर्गातल्या विद्यार्थ्यांकडे तुझे वैयक्तिक लक्ष असते म्हणून पालकांना तू सहजपणे बोलू शकतेस....जवळपास सर्वच विद्यार्थ्यांची नावे तू कशी काय लक्षात ठेवू शकतेस? तुझा विद्यार्थ्यांबद्दलचा हा जिव्हाळा मला नितांत आवडतो... 

 मागच्या काही वर्षात माझ्या तब्येतीकडे तुला जास्त लक्ष द्यावे लागते आहे; पण शाळेमूळे कधीच याकडेही दुर्लक्ष केले नाहीस... 
 माहेरची नाते कायम सांभाळत असताना सासरच्या नात्यांची वीण घट्ट ठेवणारा तुझा स्वभावही मला खूप आवडतो.... 

 आपली रसिका आता चांगल्या पदावर काम करत आपल्या घराला आर्थिक हातभार लावत आहे आणि रोहन तिच्याच पावलावर पाऊल देत उच्च शिक्षण घेत आहे... त्यांचा तुझा संवाद माझ्यापेक्षा अधिक मोकळा आणि मैत्रीचा असतो... त्यांच्या संगोपन आणि संस्काराचे श्रेय कितीतरी पटीने तुझ्याकडेच जाते....

 विचार - मनांनी आपण इतके जवळ आलेलो आहोत की आपल्यातले पती-पत्नीचे नाते आता निखळ मैत्रीचे झालेले आहे.... शाळा सुटल्यानंतर सायंकाळच्या वेळी तू तुझ्या शाळेतले किस्से सांगतेस मी माझ्या शाळेतले किस्से सांगतो... तुझ्यासोबतचा हा वेळ भुर्रकन उडत असतो! संसारातला प्रत्येक निर्णय आपण दोघे मैत्रीच्या नात्यामुळेच विचारांती घेत असतो.... 

 क्रिकेटची एखादी मॅच असेल तेव्हाच तू टीव्ही पाहतेस; एरवी कुठल्याही मालिका पाहण्याचा तुला अजिबात छंद नाही आणि जेव्हा जेव्हा तुला सवड असते तेव्हा घराची स्वच्छता करणे आणि घर नीटनेटके करणे यात तुला खूप आनंद मिळतो. तुझ्याशी गप्पा मारत मदत करता - करता आता हा माझ्याही सवयीचा भाग होत आहे!

 एक आदर्श पत्नी म्हणून मी सदैव तुला पाहिले आहे...
 तुझ्या वाढदिवसाच्या निमित्ताने तुला या पत्ररूपी शुभेच्छा देताना मला अत्यंत आनंद होत आहे... प्रभु वैद्यनाथाच्या आशीर्वादाने तुला उदंड, सुखी, निरोगी, आनंदी आयुष्य लाभो हीच प्रार्थना! 🙏🎂💐🎉

12.08.2024

युद्ध माझ्या मनाचे! काय असावा निर्णय?

 हे दोन फोटो आहेत इयत्ता आठवीच्या वर्गात असणाऱ्या विद्यार्थिनींनी मी दिलेल्या विषयावर लिहिलेल्या पत्रांचे. 

यातील पहिल्या पत्राकडे पाहिलं की माझे मन आनंदाने भरून येते; तर दुसरे पत्र पाहून खिन्नता वाटते. 

पहिलं पत्र लिहिणाऱ्या विद्यार्थिनीला शिकवण्याचा अभिमान म्हणून त्याचे श्रेय मी घेऊ की दुसरी विद्यार्थिनी अजून त्या स्तरावर नाही म्हणून त्याचेही उत्तरदायित्व मी घेऊ? की एक शिक्षक म्हणून मी फक्त सुविधा पुरवणारा आहे हे समजून घेऊ आणि 'शिकण्यात मदत करणे' एवढेच काम मी करावे; जो तो आपापल्या गतीने, मतीने शिकत असताना याचे श्रेय घेणे हेच उचित नाही असे माझ्या मनाला सांगावे?

जर मी एकाच वर्गात शिकणाऱ्या सर्वात खालच्या स्तरावरील विद्यार्थ्यांचे उत्तरदायित्व घेत नसेल तर सर्वात वरच्या स्तरावर असणाऱ्या विद्यार्थ्यांचे श्रेय घेण्याचा मला अधिकार आहे का? सद्सदविवेक बुद्धीला धरून नक्कीच नाही! 
मी स्थितप्रज्ञ राहून फक्त माझे काम करीत राहणे हेच योग्य आहे का? ना कुणी अधिक घेतल्याचा आनंद ना कोणाला कमी मिळाल्याचे दुःख! 

विद्यार्थ्यांच्या गरजेनुसार मी माझ्या अध्यापनाला अधिक सक्रिय करणे, अधिक विद्यार्थीप्रिय करणे आवश्यक आहे. जो तो आपापल्या गतीनुसार शिकत असताना त्याला त्याच्या गरजेच्या ठिकाणी योग्य साहित्याच्या योग्य भाषेच्या मदतीने शिकण्यात मदत करणे यातच आनंद मानला तर माझे शिक्षक होणे सार्थकी लागेल.... खरं आहे ना? 

तुम्ही पालक किंवा शिक्षक म्हणून काय विचार करता? मला तुमचे विचार ऐकायला आवडतील.... कदाचित मला माझ्यात करावयाच्या बदलांची विचारशृंखला आपल्याकडे मिळू शकेल.... 

तुम्हाला गोंधळात टाकणारे सारख्या उच्चाराचे; पण स्पेलिंग व अर्थ वेगळा असणारे नेहमीच्या वापरातले काही शब्द

तुम्हाला गोंधळात टाकणारे सारख्या उच्चाराचे; पण स्पेलिंग व अर्थ वेगळा असणारे नेहमीच्या वापरातले काही English शब्द

1.To/Two/Too 

    - "To" is a preposition (e.g., "I'm going to the store.")
- "टू" हे एक शब्दयोगी अव्यय आहे  (उदा., "मी दुकानात जात आहे.") दुकानात, दुकानाकडे, दुकानाला  (त, कडे, ला असा प्रत्यय लावण्यासाठी) 
    - "Two" is a number (e.g., "I have two apples.")
- "दोन" ही एक संख्या आहे (उदा., "माझ्याकडे दोन सफरचंद आहेत.")
    - "Too" is an adverb meaning "also" or "very" (e.g., "I'm going to the store too.")
" सुद्धा " एक क्रियाविशेषण आहे ज्याचा अर्थ "देखील" किंवा "खूप" (उदा., "मी सुद्धा /देखील दुकानात जात आहे.") सुद्धा, आणखी, खूप, देखील, फारच जास्त.
 
2. Their/There/They're
    - "Their" is a possessive pronoun (e.g., "Their car is red.")
       "त्यांचे" हे सर्वनाम आहे (उदा., "त्यांची कार लाल आहे.")
    - "There" is an adverb indicating location (e.g., "Put the book over there.")
        - "तेथे" स्थान दर्शविणारे क्रियाविशेषण आहे (उदा., "पुस्तक तेथे ठेवा.")
    - "They're" is a contraction of "they are" (e.g., "They're coming over tonight.")
       " They're" हे "they are " चे short form  आहे (उदा., "ते आज रात्री येत आहेत.")
 
3. Bare/Bear
    - "Bare" is an adjective meaning "without clothing" (e.g., "The tree was bare of leaves.")
    "बेअर" हे विशेषण आहे ज्याचा अर्थ "च्याशिवाय" आहे (उदा., "झाड पानांच्याशिवाय उघडे होते." झाडाला पाने नव्हती" )
    - "Bear" is a noun meaning "a large mammal" (e.g., "I saw a bear in the woods.")
- "अस्वल" एक नाम / संज्ञा आहे, ज्याचा अर्थ "मोठा सस्तन प्राणी" असा होतो (उदा., "मी जंगलात अस्वल पाहिले.")
 
 
4. Fair/Fare
    - "Fair" is an adjective meaning "just" or "reasonable" (e.g., "The judge tried to be fair.")
- "वाजवी" हे एक विशेषण आहे ज्याचा अर्थ "योग्य" किंवा "वाजवी, निष्पक्ष, न्याय, खूप खराब नसणे " आहे. (उदा.,    "न्यायाधीशाने निष्पक्ष होण्याचा प्रयत्न केला.")
    - "Fare" is a noun meaning "the cost of transportation" (e.g., "The fare for the taxi was high.")
   "भाडे" एक नाम / संज्ञा आहे ज्याचा अर्थ "वाहतुकीचा खर्च" (उदा., "टॅक्सीचे भाडे जास्त होते.")
 
 
5. Four/For
    - "Four" is a number (e.g., "I have four siblings.")
- "चार" ही एक संख्या आहे (उदा., "मला चार भावंडे आहेत.")
    - "For" is a preposition (e.g., "I'm going to the store for milk.")
- "साठी, करीता " हे एक  शब्दयोगी अव्यय आहे (उदा., "मी दुधासाठी दुकानात जात आहे.")
 
 
6. Knight/Night
    - "Knight" is a noun meaning "a medieval warrior" (e.g., "He was a knight in shining armor.")
    - "नाइट" ही एक नाम / संज्ञा आहे ज्याचा अर्थ "मध्ययुगीन योद्धा" असा होतो (उदा., "तो चमकदार चिलखत असलेला शूरवीर होता.")
 
    - "Night" is a noun meaning "the time of day" (e.g., "I'm going out tonight.")
    - "रात्र" एक संज्ञा आहे ज्याचा अर्थ "दिवसाची वेळ" आहे (उदा., "मी आज रात्री बाहेर जात आहे.")
 
 
7. Sea/See
    - "Sea" is a noun meaning "a large body of water" (e.g., "I love swimming in the sea.")
    - "समुद्र" ही एक नाम / संज्ञा आहे ज्याचा अर्थ "पाण्याचा एक मोठा भाग" असा होतो (उदा., "मला समुद्रात पोहायला आवडते.")
 
    - "See" is a verb meaning "to perceive with the eyes" (e.g., "I see a bird in the tree.")
- "पाहा" हा एक क्रियापद आहे ज्याचा अर्थ "डोळ्यांनी समजणे" (उदा., "मला झाडावर एक पक्षी दिसत आहे ")

जणू पंढरी नगरी झाली स्कॉलर केजी स्कूल

 स्कॉलर केजी स्कूल परळी वैजनाथ या शाळेची आषाढी वारी साक्षरतेची वारी म्हणून काढण्यात आली. साक्षरतेचे महत्व म्हणजेच शिक्षणाचे महत्त्व सर्व समाजाला पटवून देण्याचा प्रयत्न या वारीच्या दिंडी मधून करण्यात आला. 

पालकांनी आपल्या चिमुकल्या विद्यार्थ्यांना विठ्ठल आणि रखुमाईच्या वेशभूषेमध्ये अत्यंत सुंदर पद्धतीने नटून शाळेत आणले होते. 
छोटे असूनही विद्यार्थ्यांनी शिस्तबद्ध पद्धतीने दिंडीमध्ये साक्षरतेच्या घोषणा दिल्या. 

दिंडीचा व्हिडिओ पाहण्यासाठी येथे क्लिक करा